نئی دہلی،15؍جنوری(آئی این ایس انڈیا) آرمی چیف جنرل ایم ایم نروانے نے ہفتہ کوکہاہے کہ ہندوستانی فوج کا پیغام واضح ہے کہ وہ ملک کی سرحدوں کے ساتھ جمود کو یکطرفہ طور پر تبدیل کرنے کی کسی بھی کوشش کو کامیاب نہیں ہونے دے گی۔ یہاں آرمی ڈے پریڈ سے خطاب کرتے ہوئے انہوں نے کہا کہ گزشتہ سال فوج کے لیے بہت چیلنجنگ تھا۔ انہوں نے چین کے ساتھ شمالی سرحدوں پر پیش رفت کا حوالہ دیا۔آرمی ڈے ہر سال 15 جنوری کو فیلڈ مارشل کے ایم کریپا کے 1949 میں اپنے برطانوی پیشرو کی جگہ ہندوستانی فوج کے پہلے ہندوستانی کمانڈر انچیف کے طور پر سنبھالنے کی یاد میں منایا جاتا ہے۔

مشرقی لداخ تعطل کا حوالہ دیتے ہوئے جنرل نروانے نے کہا کہ حال ہی میں حالات کو قابو میں رکھنے کے لیے ہندوستان اور چین کے درمیان فوجی سطح کی بات چیت کا 14 واں دور ہوا۔انہوں نے کہاہے کہ مختلف سطحوں پر مشترکہ کوششوں کے نتیجے میں کئی علاقوں میں فوجیوں کی پسپائی مکمل ہوئی جو کہ اپنے آپ میں ایک تعمیری قدم ہے۔جنرل نروانے نے کہاہے کہ باہمی اور مساوی سلامتی کی بنیاد پر موجودہ صورتحال کا حل تلاش کرنے کی کوششیں جاری رکھیں گے۔انہوں نے کہاہے کہ ملک کی سلامتی کے لیے برف پوش پہاڑوں پر تعینات فوجیوں کے حوصلے آسمان کو چھو رہے ہیں۔

جنرل نروانے نے کہاہے کہ ہمارا صبر ہمارے اعتماد کی علامت ہے، لیکن کسی کو بھی اسے آزمانے کی غلطی نہیں کرنی چاہیے۔انہوں نے کہاہے کہ ہمارا پیغام واضح ہے، ہندوستانی فوج ملک کی سرحد پر جمود کو تبدیل کرنے کی یکطرفہ کوشش کو کامیاب نہیں ہونے دے گی۔پینگونگ جھیل کے علاقے میں پرتشدد جھڑپوں کے بعد ہندوستان اور چین کی فوجیں 5 مئی 2020 سے مشرقی لداخ میں فوجی تعطل میں مصروف ہیں۔ دونوں ممالک نے تعطل کو حل کرنے کے لیے فوجی سطح کے مذاکرات کے 14 دور کیے ہیں۔جنرل نروانے نے کہاہے کہ لائن آف کنٹرول (ایل او سی) پر حالات پچھلے سال کے مقابلے بہتر ہیں لیکن پاکستان اب بھی دہشت گردوں کو پناہ دے رہا ہے۔